السلام عليكم ورحمة الله
اخواني .. اقدم لكم هالموضوع الي لاهو منقول ولاهو مني يعني نص ونص
تقدرون تقولون انه خلاصة مواضيع تعليم الشعر الي موجودة بالنت, يعني المختصر المفيد بتصرف وتوضيح مني خصوصا في توضيح الوزن , ارجو انكم تستفيدون منه ..
قبل ما نبدا لازم نعرف شنو الشعر؟؟؟
الشعر عبارة عن: فكرة + مفردة + قافية + وزن + ابداع
وهاليومين الشاعر لازم يكون مزيون والقاءه حلو ولا محدن يلتفت له هههههههههههههه
والابداع في التعبير هو الي يحدد الشاعر الزين من الشين
اولا: (الفكرة)
الفكرة تجي على حسب الموقف او الوضع الي يعيشه الشخص, والفكرة لازم يكون فيها شي من التفصيل, ولا بتكون غرض شعري وليس فكرة >>> ادري ما فهمتوا
مثال:
الغزل >>>>>>> غرض شعري
التفنن بوصف المحبوبة >>>>>>>>>>> فكرة عامة
والفكرة العامة تتشعب وتتفرع وتنتج منها ابيات القصيدة, وتشعب الفكرة من خلال الصور والتشبيهات هو الي يحلي القصيدة, يعني تقدرون تقولون انه قلب القصيدة.
ثانيا: (المفردة)
وهني المصيبة والطامة الكبرى ...
باشدد على ملاحظات كثيرة وباحطها على شكل نقاط عشان تكون واضحة للكل...
1- اياكم والوقوع بالشرك..
كثير من الشعراء للاسف يقعون بدائرة الشرك بسبب بعض الالفاظ الي حسوا انها مناسبة للقصيدة واحيانا تكون محشوة في القصيدة ووضعها الشاعر لخدمة الوزن فقط ...
مثال:
وراسج >>>> حلف بغير الله
حبج جنتي وناري >>> مستغني عن الجنة الاخ ولا شنو؟ @@
وكثير غيرها ما تحضرني امثلة ثانية الحين
كلمات تشوفونها عادية لكنها تكتب وتحاسبون عليها فاحذروا
اللهم اني بلغت اللهم فاشهد
2- تكفون لا تسبون
مثال:
يا بنت ....... >>>>>> انصدمت لما سمعتها من شاعر معروف
ما نقول الا الله كريم
3- لا تكرر اللفظ الواحد اكثر من اللازم, نوع بمفرداتك وغلفها وبدع فيها.
4- استخدم المفردات الي تستخدمها بكلامك العادي, يعني مو شرط تكون الالفاظ عميقة وثقيلة عشان القصيدة تطلع حلوة, بالعكس كل ما كنت على طبيعتك كل ما وصل شعرك للقاريء بشكل اسرع.
5- لا تجمع المفرد ولا تفرد الجمع, ولا تذكر المؤنث ولا تؤنث المذكر.
ثالثا: ( القافية)
هني ابيكم تركزون معاي شوي
القافية هي آخر حرف او حرفين او ثلاثة او حتى اربعة من الشطر
اذا كانت القافية من حرف واحد لازم يكون الحرف ساكن
مثال: بحر – شي – شبل
اذا كانت القافية تتكون من اكثر من حرف لازم تراعي تشكيل الحروف + حركة الحرف الواقع قبل حروف القافية >>>> طبيعي مو فاهمين
توضيح:
لو كانت آخر كلمة في الشطر الاول هي ( مشاريه )
وانا ابي اثبت آخر حرفين من الكلمة الي هم (يه)
لي الحين كل شي تمام ...
لو باعدد كلمات من نفس القافية باقول ( تماديه – شاريه – مابيه ... الخ)
طيب لو قلت ( رايه ) ؟؟؟
آخر حرفين نفس الشي ( يه ) !!
هل تعتبر ( رايه ) من نفس القافية؟؟؟؟
طبعا لا ...
والسبب ان في كلمة (مشاريه) حرف الياء ساكن(مد) وفي كلمة (رايه) حرف الياء مفتوح ...
دام ان الحرفين ما لهم نفس التشكيل اذا الكلمتين ليسوا قافية وحدة
اعتقد ان الكلام واضح لي الحين ..
اما بالنسبة لاختيار القافية لقصيدتك , فلا تتعمد قافية معينة واتركها تجي بروحها, وهي بتطلع لك مع اول بيت وتمشي القصيدة كلها على نفس قافيته.
ملاحظة:*
حاول انك ما تكرر الكلمة في القافية لاكثر من مرة لانه يعتبر ضعف الا في حالتين:
1- اذا كان التكرار ضروري ويخدم القصيدة.
2- اذا كانت نفس الكلمة ولكن معناها مختلف في كل مرة.
مثال:
العين >>> العين ما غيرها الي نشوف فيها
العين >>> عين الماء
العين >>> الحسد
.......... الخ
في الحالة الثانية يكون التكرار نقطة لصالح الشاعر وليست ضده, بالعكس التكرار هني يزيد من جمال القصيدة.
ولتبسيط الموضوع , عدد كلمات من نفس القافية واكتبهم على صوب وركب عليهم الابيات
ثالثا: الوزن ....... >> ربي يعيني
اولا:
هذا ملخص عن بحور الشعر ...
- بحر المسحوب : وهو أكثر البحور استخداما في أيامنا ، وذلك بسبب خفته وسهولة تفاعيلة وسلاسته ؛ مثال (أنا حبيبي بسمته تخجل الضيّ .. يكسف سنا بدر الدجى من جبينه).
وتفاعيله (مستفعلن مستفعلن فاعلن
تزاد في المسحوب حركة وسكون آخر الشطر)
2- بحر الصَخَرِي : وقد سميّ بهذا الاسم نسبة لقبية بني صخر ، والمعروف عن هذا البحر أنه ذو نبرة حزينة ؛ مثال ) غريب الدار ومناي التسلي .. أسلي خاطري عن حب خلي )
3- بحر الهجيني : وهو بحر مشهور جدا ويعد من أكثر البحور استخداما بعد المسحوب في الخليج ، ويتميز بأنه سهل النظم سريع لايقاع ويقال بأنه سمي بهذا الاسم لعلاقة بين إيقاعه وطريقة سير الهجن أو الجمال ، مثال ( قصيدتي لاغدى ضييّ .. شحيح وارتبكت ايديني ..وتعثرت بي خطاويي .. ولا عاد رايي يقديني .. وصرت أطلب الصاحب يعيي .. ماغير بعدين بعديني .. وتنكرولي بني خيي .. واستسهلوني معاديني .. والموت ماعاد متهيي .. والعمر ماعاد يمديني .. تكفين لا يابعد حيي .. ظلي معي لاتهديني)
4- بحر الــحـــداء : وينطق الحدا .. وهو بحر قصير الفقرات سريع النغمات قليل الأبيات .. مثال ( يا بو هلال ليتك تشوف .. حطوني العسكر نظام .. يقودني مثل الخروف .. العسكري ولد الحرام ) .
وتفاعيله (مستفعلن مستفعلن مستفعلن)
5- الــعــرضــه : وهو لون جماعي حماسي يغنى بمجموعات ، وقد سمي بالحربي .. مثال :
( والله ياللي منتوي حربنا مايليق .. واللي زبنا ننثني دونه وعينه ماتنام .. واللي قعد عن لابته لاتجعلونه رفيق .. خله مع الخفرات خدامٍ لسمر اللثام).
6- الســــامـــري :غني عن التعريف بحر من البحور الجميله جداً ....مثال :-
تريد الهوى لك على ماتريد **وعمرٍ تقــضّى تــــريده يعود
وتفاعيله (فعولن فعولن فعولن فعولن)
ثانيا:
الوزن يتم بطريقتين :
الطريقة الاولى هي التلحين والثانية هي التفاعيل
يتم التلحين بحيث انك تسحب ابياتك على لحن معين تمشي عليه القصيدة ووين ما حسيت ان الوزن اختل فهذا يكون مكان الكسر
التلحين غير مضمون 100% لان احيانا الواحد يمط الكلمات مط عشان تمشي مع اللحن
وافضل طريقة تضبط فيها التلحين هي انك تسمع قصايد ملحنة (شيلات)
مثال: اشرطة كاسيت المقناص ( 3 او 4 اجزاء) وغيرها
هذا بالنسبة للتلحين ...
اما التفاعيل ... >>> ياخذ نفس عميق
انا بابسط لكم الموضوع لاقصى درجة >>> ينفع مدرس
الابيات عبارة عن كلمات والكلمات عبارة عن حروف والحروف نوعين اما ساكن او متحرك
الحرف المتحرك: هو الحرف الي يا عليه فتحة او ضمة او كسرة
الحرف الساكن: هو الحرف الي لا عليه لا فتحة ولا ضمة ولا كسرة
نرمز للحرف المتحرك بالرمز /
نرمز للحرف الساكن بالرمز @
ماني شارح لكم بالتفصيل باعطيكم المختصر المفيد لان الموضوع بسيط ماله داعي نصعبه
الفكرة هي انك تاخذ البيت وتترجم حروفه ( المتحركة والساكنة) للرموز / و @
ابي اشرح بالتفصيل على ابيات نزلتها باول مشاركة لي بالمنتدى
سلام عد ما قد كتبت امن الحروف ......... للي لفيت ديارهم لمْعَمورة
حفيد حاتم .. شاعر .. ولاني معروف ...... لكن قصيدي يسلب النور نوره
قصيدي اشيده تشييدة الطوف .......... على اساسن صلب وشيلاتي سوره
هذي اول ثلاث ابيات من القصيدة ..
قبل لا تبدون بترجمة الابيات لازم تعرفون الآتي:
1- حروف العلة سواكن ( ا, ى, و )
يعني المد ساكن, اما اذا جت الحروف الثلاثة بتشكيل فتترجمها متحركة
مثال: ( أَكره )
حرف الالف هنا مفتوح يعني متحرك يعني( / )
2- الحرف المشدد يترجم @/
لا تسالون ليش ؟ هذي هي القاعدة >>>>>>>> ما يدري ليش ههههههههههه
لا يبه اضحك لووووووول
الحرف المشدد عبارة عن حرفين الحرف الاول ساكن والثاني متحرك
مثلا في الابيات السابقة كلمة (اشيَده)
اذا ترجعون لحروف الكلمة الاصلية بتكون جذي: ( أ شـ يـْ يِـ دْ هِ )
حرفين متكررين الاول ساكن والثاني متحرك
3- قبل الترجمة لازم تعيدون كتابة البيت مثل ما تنطقونه بالضبط , يعني الحروف الي ما تلفظونها ما تنكتب ولا تترجم, والكلمات الي تدمجونها ببعض في اللفظ تكتبونها مندمجة. >>> بالامثلة توضح المسالة اكثر
ما ابي اذكر التفاعيل وتفاصيلها لاني بصراحة لا استفدت منها ولا نفعتني , باعطيكم الزبدة او الخلاصة
ومن عنوان الموضوع <<< اسهل طريقة لكتابة الشعر
يعني نبي نبسط ما نبي نصعب
اول بيت بالقصيدة يلفظ كما يلي :
سَلامِعَدْ ماقد كِتَبْتِمْنَ لِحروف ........................... للـْ لِي لفيتِدْيارهم لِمْعَمورة
//@//@/@/@//@/@//@/@@ ....... /@/@//@/@/@//@/@//@/@
هذي ترجمة البيت الاول , واذا كانت القصيدة موزونة بيكون البيت الثاني بنفس الترجمة وكذلك باقي ابيات القصيدة
البيت الثاني:
حفيدحاتم شاعرولانِ معروف ...................... لاكن قصيدي يِسْلِبَنْـ نُورِ نوره
//@//@/@/@//@/@//@/@@ ....... /@/@//@/@/@//@/@//@/@
تلاحظون ان وزن الشطر الاول في كلا البيتين واحد , وكذلك وزن الشطر الثاني في البيتين واحد
يعني انا ماشي تمام
الطريقة هذي صعبة وتحتاج واحد متفرغ عشان يكتب قصيدة كاملة بنفس الطريقة مع انها اضمن من التلحين.
طيب شتسوون اذا كان التلحين اسهل والتفاعيل اضمن؟؟؟؟
الحل عندي ...
الحل انكم توزنون القصيدة بالتلحين وتنسون التفاعيل والترجمة مؤقتا
وبعد ما تنتهون من كتابة القصيدة وكان عندكم بيت او بيتين شاكين بوزنهم , تترجمون هذي الابيات ( الي شاكين فيها) وتقارنونها مع اول بيت بالقصيدة والي هو اساس وزن القصيدة
وعشان تكون شاعر مو لازم تعرف كل البحور او تكتب على كل الطواريق, في شعّار كسروا الدنيا ولا يكتبون الا على طرقين او ثلاث والباقي ما عمرهم كتبوا عليه
انا عن نفسي اكتب على طرقين ولا اكتب على غيرهم
يا اخي اذا كنت قادر تعبر عن نفسك وتبدع بقصيدك بالسهل ليش تعقد روحك بالصعب؟؟؟؟
بعد ما تكتبون القصيدة وتنتهون منها لا تستعجلون نشرها بالمنتديات, اتركوها فترة وردوا لها مرة ثانية اقرواها وصدقوني راح تكتشفون فيها ملاحظات ما كنتوا شايفينها وبتغيرون فيها كثير.
القصايد عموما نوعين ...
النوع الاول سلق بيض ....
لا تفهموني غلط ما اقصد انها قصايد ردية انا اقصد ان شاعرها كتبها على عجل وغالبا ما تكون هالقصايد وليدة اللحظة وناتجة عن موقف مباشر
النوع الثاني مطبوخ على نار هادية ....
هني القصيدة تكون مضبوطة عدل باذن الله, بس ممكن تكون النتيجة عكسية اذا احتفظتوا بالقصيدة لفترة طويلة من غير ما تنشرونها لانكم راح تملون منها وتكرهونها<<<< مجرب
وفي الختام ....
يا جماعة انا بشر والبشر خطائون ...
هذا اجتهاد شخصي يمكن ينفع البعض وممكن البعض ما يستفيدون كثير ويمكن تكون في اخطاء او ملاحظات بكلامي , فاي احد عنده أي ملاحظة او سؤال على الموضوع يسال ولا يرده الا لسانه
وصدقوني ان من يطبق الي قلته عدل وركز فيه واجتهد بيحصل نتيجة طيبة ان شا الله
والمسالة مسالة وقت فقط لا غير
لا تستعجلون كل شي بالهداوة حلو
وتراني مبتديء حالي من حالكم تعلمت القصيد من النت
قريت مواضيع تعليم من 80 صفحة واكثر ونشرت قصايد بالبداية كانت ركيكة وبعدين مع الوقت ضبطت الوزن وفهمت القصيد ...
والي يبي يحاول يجرب طريقة التفاعيل يجرب يترجم ثالث بيت من قصيدتي بنفس الطريقة ويشوف
اذا طلع له نفس الوزن في الابيات السابقة يعني هو ترجم صح واذا غير يعني في خطا بترجمته
وممكن يكون الخطا ناتج عن اختلاف نطقي للكلمة عن نطقه هو, والي يبي يسال عن محاولته بالترجمة يضع ترجمته ونشوف معه اذا فيها اخطاء او ملاحظات او انها تمام.
عموما الي عنده أي سؤال لا يرده الا لسانه سواء يبي يسال هني او عن طريق رسالة خاصة
وسامحوني على القصور ...
الثلاثاء يونيو 03, 2008 9:38 am
